KYNMAW

KYNMAW
Ko kynrem ko lyndan
Khun dap shynrang I mei
Phi la kiew, phi la stad
 Da jingiarap u Blei
Shaphrang phi la nang kiew
Sha ka thong phi la nangbeh
Jinglong mynsiem nangrit 
Malade ka nang heh
 
Phi la klet mo mynta
Ia jingkyrkhu u Blei
Phi la iehnoh shadien 
Ia mynsiem lehisynei
Mynsiem sarong, sngewmeng
Jingsngewstad sdang synshar
Tarajur noh shilliang 
Na bynta I saipan
 
Phi iai thud phi iai rwad
Tang kiei kiei pyrthei
Ka rukom pyrkhat-iohi 
La sdang rit I jylli
Jinglong mynsiem sdang pjah
Jingngeit kah syrngiew
Ia u Blei artatien 
Phim salia para briew
 
Phi la leh bymsalia 
Ha jingim man ka sngi
Ia u Blei phi kyntait
Phi pyrshang ban iaid hi
Ynda kut ka jingim
Phin iai kyrtoh weibriew
Ynda sna iap ka tur 
Phin sa jlew  sngewngiew

By Strongberth S. Kharbuli

All Rights Reserved by the Author (C)
Ia ka Hok Longtrai la tyngkai

{ ia kane ka poem nga la pynmih ha ka Magazine 2010 jong ka Skul St. Dominic Savio's Higher Secondary School, kum u Past Pupil, mynba ka rakhe ia ka lyngkhuh jingdap 50 snem jong ka (Golden Jubilee Celebration)}

[kynmaw: ka mut ban kynmaw ia ka mynnor (remembrance) bad ka mut ruh ka jingmaham (Warning)  ba na kaei kaba ngi la mad ba ngin ym leh shuh]